啱新手操定先《Street Fighter V》要你等更新

经典格斗系列《Street Fighter V》终于正式推出,从佢第一代开始揭开格斗游戏序幕,到第二代将格斗game推上高峰,直到而家放得上大型比赛嘅格斗游戏剩得番佢,好多新旧玩家都期待第五集推出。《Street Fighter V》主打网上对战功能,虽然玩法大同小异,但多咗个V-Gauge系统,想上手又要练习一下。

冇咗街机模式!

之前试版都只有1P/2P对战,大家唔知电脑AI各方面係点。点知一出嚟……竟然缺少例牌Arcade Mode。如果想一条友打,可以选择剧情或者生存模式。由于今集故事时间係设定于第四及第三集之间(四係比三更前),可能因为咁故事创作上就有啲限制,所以各个角色啲剧情好简单,加上剧情模式内对手嘅AI係低能嘅,兼且冇得校难度,乱揿随时爆到机。如果大家想操吓招先上网同人打,只好选择生存模式。呢个模式简单嚟讲就係一行能源打有咁多得咁多对手,中间赢咗嘅话可以选择用得分补生命值或者V同EX嘅气,因为有难度选择,咁你可以单机操吓先,唔使上网做鱼腩。

V-Gauge系统

讲返今次新嘅「V-Gauge系统」,主要係用嚟发动V-Reversal同埋V-Trigger招式。V-Gauge係EX以外嘅另一行气,玩家只要成功发动「V-Skill」招式就会增加V-Gauge储气量。唔同角色分别会有两格式者三格嘅V-Gauge,发动V-Reversal会扣一格V-Gauge,而发动V-Trigger就需要储满咗成条V-Gauge先得。每个角色嘅V-Skill、V-Reversal同V-Trigger招式同效果都唔一样,有啲攻击有啲挡格有啲可以改变招式属性,有啲甚至可以用嚟反击或者驳招。由于V-Gauge系统三招都係好易发动,所以即使一向玩格斗Game唔叻嘅朋友都可以容易上手。

啱新手操定先《Street Fighter V》要你等更新
◆ 入到去,咦?冇Arcade Mode嘅?啱新手操定先《Street Fighter V》要你等更新
◆ 一个人得二至三关剧情……啱新手操定先《Street Fighter V》要你等更新
◆ V-Skill个个唔同。啱新手操定先《Street Fighter V》要你等更新
◆ V-Trigger爆气。啱新手操定先《Street Fighter V》要你等更新
◆ 去到生存模式,嗰阵难打咗。 啱新手操定先《Street Fighter V》要你等更新
◆ 打赢咗可以买返啲命或者气。啱新手操定先《Street Fighter V》要你等更新
◆ 出超必当然有zoom in动画。啱新手操定先《Street Fighter V》要你等更新
◆ 上网搵人打,搵着个咁少布嘅春丽,真係想好好咁教训吓佢!但同时又想食多佢几脚,好矛盾呀!

街霸高手HumanBomb点睇新街霸?

啱啱提到新嘅V-Gauge系统令游戏变得易上手,咁对于喺旧街霸得到过世界排名第五位嘅顶级高手HumanBomb嚟讲,今集《Street Fighter V》又係点呢?我哋特登邀请佢为大家简单讲一讲:

啱新手操定先《Street Fighter V》要你等更新

问(笔者) H(Humanbomb)

问:你觉得今集战斗系统如何?有咩好处同唔好处呢?

H:一直以来每一集街霸都会有唔同嘅战斗系统,而今集就係V-Gauge系统。我比较锺意佢每个角色嘅V-Skill都唔一样,不过讲到V-Trigger就好似变化唔太多,主要都係通常技Cancel V再接通常技Combo。

问:对于今集嘅各项转变你又有何意见呢?

H:相比前作,今集明显比较新手向,Combo亦比较易出到,拉近咗新手同老手嘅距离。

问:虽然之后会再有六个角色推出下载,不过暂时你觉得有边几位係最易用又最劲呢?

H:我觉得暂时嚟讲阿隆、春丽、Nash同埋Birdie係比较易用同埋力量又强嘅,如果係新手不妨可以由呢几位入手。

问:最后你可唔可以畀多少少贴士玩家点样可以打得劲啲呢?

H:其实街霸从来都好着重对空,最初可以尽量唔好畀到对手进行近身战。不过相反当你有咁上下技术时就要多靠近身战去攻击。

製作人专访

PlayStation喺早前C3HK 2016请嚟《Street Fighter V》两位製作人绫野智章先生及小野义德先生同大家见面,同时亦安排咗一次专访。我哋一众记者问咗几条大家关心嘅问题,以下係笔者为大家精选嘅其中几条。

啱新手操定先《Street Fighter V》要你等更新

记(记者) 製(製作人)

记:今集好奇怪地上网玩家都冇得拣代表香港,其实係咩原因呢?会唔会下个更新会有返呢?

製:乜原来冇得拣香港咩?我已经收到你哋嘅意见,返去会同开发团队商量会否加返。(记者按:原来佢竟然唔知……)

记:除咗已公布嘅6个角色,嚟紧会否再加其他新增角色?

製:暂时2016年除咗嗰6位角色应该就唔会再有新增,但去到17、18年会係点就未有定案,但既然SSF4都有成44个角色,所以一定会有再新增,但会唔会再有比44个更多,就要睇下大家对游戏有几支持。

记:唔少朋友都反映今次剧情模式太简单,日后会否考虑提升返难度呢?

製:其实如果你觉得剧情模式太简单,可以试吓挑战啱啱公布咗将会推出嘅挑战模式,相信大家会感到非常有「感觉」。嚟紧六月我哋将会推出另一个「更新故事模式」,入面会有啲难关係需要跨越。另外依家大家亦可以玩生存模式,我觉得呢部份係几高难度,相信会令大家满意。

记:可否讲多少少关于「更新故事模式」?

製:由于街霸故事入面第四集同第三集之间係有一段好长嘅时间相距,而第五集其实係之间嘅时间。《街霸V》其实係想讲返每个角色喺第四集之后做过啲乜而变成咗第三集嘅样子。

记:想问稍后新增嘅角色係咪一加入就有佢自己剧情模式嘅剧情?另外想问係咪唔会再有Arcade Mode?

製:故事方面暂时仲未讲得。Arcade Mode方面,喺游戏推出之后好多人都有问相同问题,当时我哋先忽然惊觉原来Arcade Mode大家係咁想要,所以我哋嚟紧就会同开发团队商量一下係唔係会加返Arcade Mode入去。

操定等update差唔多

相信坊间唔少玩家都同笔者一样觉得呢只係一只未完成嘅game,角色又话慢慢加、剧情又话迟吓加,甚至连玩法都未齐。对于好多街霸高手嚟讲可能暂时真係未係一只值得花时间玩嘅game。不过对于好似笔者呢类高不成低不就嘅玩家,呢个时候可以预先咁操练吓,未尝唔係一件好事。事实上,今集整体操作同出招指令都简单咗,V-Gauge系统本身又唔难发动,最适合笔者呢种冇乜天份嘅人玩,唔使同啲高手差距拉得咁远,上网同人对打都唔会咁有挫折感(好似係)。所以话依家操定先,等日后再多啲色角同剧情加返上去,应该会更加精彩。